Sayidat wa Aamal The Whole magazine Package
رولى ابراهيم التوم
وين ثقافتنا السياسية ووين وعينا الاجتماعي؟ وين ألأهل من كل اللي عم بيصير؟ أنا أم وعم بحارب كل يوم كرمال علّم ولادي يحبّوا هيدا الوطن، يضلّوا فيه، يتعلّموا ويكبروا فيه، مش كرمال يطلعوا عالمنابر ويهاجمو بعض ويحمّلوا حقد ما بيشبهنا، حقد عم ينزرع فيهم من ورا كلمات وبرامج ما إلها علاقة فينا. عم شوف هالشباب والصبايا كيف عم يتفرّقوا وكيف بيتأثّروا بكل كلمة عم تنقال وهني بعدن متل العجينة، وهون الخطر… لأنو إذا ما في مسؤولية ورقابة، الكلمة بتصير سلاح وبتدمّر ولادنا. ما بيجوز يكونوا ولادنا بوز المدفع ولا يوقفوا ضد بعضهم بلا وعي وبلا مسؤولية. نحنا مش بحالة طبيعية، نحنا بحرب، بس مين ضد مين هلّق مش هو المهم، المهم نكون إيد وحدة وقلب واحد ونحافظ على كل شبر من لبنان، لأنو إذا خسرناه خسرنا كل شي. Please وقفوا مزايدات، وقفوا تلعبوا بعقول الشباب، وقفوا تنضاروا وانضاروا بس للوطن. هيدا وطننا ونحنا مين ما كنا نكون لازم نكون أوفياء لهيدا الوطن وأولياء عليه. ولادنا مش ساحة صراعات، ولادنا أمانة، ربّوهم على الحب مش على الحقد، لأنو بهالطريقة ما عم نصلّح، عم ندمّر. خلّونا لما نقول كلنا للوطن نقولا عنجد، نكون كلنا قلب واحد ووطن واحد، ولا شبر أقل بوجه أي محتل مين ما كان يكون . لانو اذا الوطن راح كلنا منروح وساعتها تصبحون على وطن💔ومنصير فعلاً مسرحية.
