مش هيك تربينا

رولى ابراهيم التوم

تربينا انو شيعي وسنٌي و ميسيحي ودرزي كلنا أهل
تربينا إنو الجار قبل الدار وإنو الخوف بكون ع بعض مش من بعض
تربينا إنو إذا انقسمت اللقمة بيناتنا بتكفي الكل
وإنو البيت اللي بابو مفتوح للجار ما بيعرف لا طايفة ولا مذهب
كبرنا سوا ،لعبنا سوا، وضحكنا سوا.
وكانت إمي تسأل عن ولاد الجيران قبل ما تسأل عنا
شو صار فينا؟
كيف تحول الأمان لخوف؟
وكيف صار الجار بخاف من جارو بعد ما كان مخبى بعيونو؟
بحروب الكبار نحنا انكبينا ع الطرقات.تشردنا وضاعت بيوتنا وانكسرت قلوبنا.
ضيٌعنا بعض وما عدنا نلاقي بعض.وصرنا نخاف نسأل ع بعض و نخاف نفتح بيوتنا لبعض….. حتى السلام صرنا نقولو بخوف.
ليش حرقتونا و نحنا عايشين ليش قتلتو الضمير اللي كان بعدو حيٌ فينا؟ليش خليتو الجار يبعد عن جارو؟ والقلب بتقٌسم بين طايفة وطايفة ؟
شو دنب الصغار بحروب الكبار؟شو ذنب الأطفال يللي عم يكبرو ع صوت الخوف بدل الضحكة؟ شو ذنب الدين والطايفة والمذهب يللي كلن بصرخو للسلام؟

دقٌو جراس الكنايس ووحدو صوت الجوامع
خلٌو الصلا تعلٌي فوق وجعنا كلو وتصرخ من قلب هالبلد
بدنا نرجع أهل
بدنا نرجع قلب واحد
بدنا نرجع لبنان اللي ربوٌنا علي
لانو اذا ضاع هالشي ما بيبقى من لبنان غير بلد ….. بلا روح.